ನಮ್ಮೂರು

ಮೂಡಣಕ್ಕೆ ಮುಖ ಮಾಡಿ ನಿಂತ ಮನೆಗಳು 
ಬೆರಳೆಣಿಕೆಯ ಸಂಸಾರಗಳು 
ಪ್ರತಿ ಮನೆಯಲ್ಲೂ ಪುಟ್ಟ ಪುಟ್ಟ ಮಕ್ಕಳು   

ಮುಂಭಾಗದಲ್ಲಿ ಹರಡಿದೆ ಅಡಿಕೆ ತೋಟ 
ಹಿಂಭಾಗದಲ್ಲಿ ದಟ್ಟವಾದ ಕಾಡು 
ಊರ ಹೊರಗಿನ ಎರಡು ಕೆರೆಗಳು 

ಊರ ಮಧ್ಯದಲ್ಲಿದ್ದಾನೆ ನಮ್ಮ ಗಣಪ 
ತೋಟದಲ್ಲಿದ್ದು ಕಾಯುತ್ತಾನೆ ನಾಗಪ್ಪ 
ಅಲ್ಲಿಯೇ ಇದ್ದಾಳೆ ನಮ್ಮವ್ವ ಚೌಡಿ 

ಬಗೆ ಬಗೆಯ ಮಾವಿನ ಗಿಡಗಳು 
ವಿದವಿಧದ ಹಣ್ಣುಗಳು 
ತರತರಹದ ಔಷಧಿ ಗಿಡಗಳು 

ದೂರದಲ್ಲಿರುವ  ನಮ್ಮ ನೆಚ್ಚಿನ ಶಾಲೆ 
ದಾರಿಯಲ್ಲಿ ಸಿಗುವ ನೀರಿನ ಬುಗ್ಗೆಗಳು 
ಎದುರಲ್ಲಿ ಆಗುವ ಕಬ್ಬಿನ ಆಲೆಮನೆ 

ಅಡಿಕೆ ಒಣಗಿಸಲಿರುವ ಚಾಲಿಕಣ
ಆಗಿದೆ ಅದು ನಮ್ಮ ಆಟದ ಮೈದಾನ 
ಅಲ್ಲಿ ಮಲಗುವುದೆಂದರೆ ನಮಗೆ ಔತಣ 

ಸುಪ್ರಭಾತ ಹಾಡುವ ಹಕ್ಕಿಗಳು 
ನಾಟ್ಯ ಮಾಡುವ ನವಿಲುಗಳು 
ಆಟ ಆಡುವ ಮೊಲ ಅಳಿಲುಗಳು 

ಮನಸಿಗೆ ಮುದ ನೀಡುವ ಸೂರ್ಯಾಸ್ತ 
ವಿಶಾಲವಾದ ಭತ್ತದ ಗದ್ದೆಗಳು 
ನೀರಾವರಿಗೆ ನೆರವಾಗುವ ಹೊಳೆ 

ವರ್ಣಿಸಲು ಸಾಲದು ಶಬ್ದಗಳು 
ಇವು ನಮ್ಮೂರಿನ ಸಂಗತಿಗಳು 
ಹೆಮ್ಮೆಯಾಗುತ್ತದೆ ಇದನ್ನು ಹೇಳಲು 

ನಮ್ಮ ವಿದ್ಯಾಲಯ

ನಮ್ಮ ವಿದ್ಯಾಲಯ 

ಬಂದರೆ ವಿಚಿತ್ರವೆನಿಸುವ ವಾತಾವರಣ 
ಮಸಣದತ್ತ ಬಹುಮಂದಿ ನಡೆಸಿದರು ಪಯಣ 
ತಿಳಿಯದು ಯಾವುದು ಮೂಡಣ ಪಡುವಣ 

ಹೊತ್ತಿಗೆಗಳೇ ಇಲ್ಲದ ಗ್ರಂಥಾಲಯ 
ಅವ್ಯವಸ್ಥಿತ ಪ್ರಯೋಗಾಲಯ 
ಎಲ್ಲವೂ ಇದೆ ಎಂದು ಬೊಗಳುವ ಮಹಾಶಯ 

ಅನುಭವವಿದ್ದರೂ ಸುಜ್ಞಾನವಿಲ್ಲದ ಶಿಕ್ಷಕರು 
ಮಕ್ಕಳನ್ನು ಖೈದಿಗಳಂತೆ ಕಾಣುವ ನೀಚರು 
ಲಂಚದಿಂದಲೇ ದಿನ ಆರಂಭಿಸುವ ಆಡಳಿತ ವಿಭಾಗ 

ಬುಧಿವಂತಿಕೆಗೆ ಬೆಲೆಸಿಗದಿರುವ ಗುರುವ್ರಂದ
ನಿಷ್ಠೆಯಿಂದ ದುಡಿಯುವ ಕಾರ್ಮಿಕರು 
ವಿದ್ಯಾರ್ಥಿಗಳ ಗೆಳೆಯರಾಗಿರುವ ಸಿಬ್ಬಂದಿಗಳು 

ಎಲ್ಲ ಖರ್ಚನ್ನೂ ಭರಿಸುವ ವಿದ್ಯಾರ್ಥಿಗಳು 
ಗೋಸುಂಬೆಗಳನ್ತಿರುವ ಮುಖ್ಯಸ್ಥರು 
ಕಲಾವಿದರ ಗೌರವಿಸದ ಮೂಢರು 

ಶಿಸ್ತಿನ ಹೆಸರಲ್ಲಿ ಶಿಕ್ಷಿಸುವ ಶೋಷಕರು 
ಹಗೆ ಸಾಧಿಸುವ ಬಲಾತ್ಕಾರಿಗಳು 
ಮದ ತುಂಬಿದ ಮಂದರು 

ಸ್ವಂತ ಬುದ್ಧಿಯಿಲ್ಲದ ಅವಲಂಬಿಗಳು 
ಏಕತೆಯಿಲ್ಲದ ವಿಭಾಗಗಳು 
ಹಣ ಮಾಡಲು ನಡೆಸುವ ಬಗೆಬಗೆಯ ಕಾರ್ಯಕ್ರಮಗಳು 

ಇದು ಮುಗಿಯದ ಕಥೆ 
ಬರೆಬರೆದು ನಾ ಸೋತೆ 
ಹೀಗಿದೆ ನಮ್ಮ ವಿದ್ಯಾಲಯದ ವ್ಯಥೆ 

ಕನಸಿನ ಕನ್ಯೆ

ನೀಳ ಜಡೆಯ ನಲ್ಲೆ
ಅವಳ ಪ್ರತಿ ನಡೆಯ ನಾ ಬಲ್ಲೆ
ವರ್ಣಿಸಲು ಕಷ್ಟವಾದ ಶಿಲ್ಪಕಲೆ

ಹಣೆಯು ಚಂದಿರನಂತೆ ಸುಂದರ
ಮೂಗು ಕಾಂತಿಯ ಅಂಕುರ
ಕೆನ್ನೆಯ ಮೇಲೆ ನಗುವಿನ ಉಂಗುರ

ಮನಸೆಳೆವ ಕಣ್ಣುಗಳು
ಮುತ್ತುದುರಿಸುವ ತುಟಿಗಳು
ಗುಲಾಬಿ  ದಳದಂತಹ ಕಿವಿಗಳು

ಮೊದಲ ನೋಟದಲ್ಲೇ ಮನಸೋತೆ ಅವಳಿಗೆ
ನೆನಪಾದಳು ಪ್ರತಿ ಗಳಿಗೆಗೆ
ನಾನೊಬ್ಬನೇ ಬಿದ್ದಿರಲಿಲ್ಲ ಅವಳ ಮೋಡಿಗೆ

ಶರಣಾದ ಗಿಡಗಳು ಬೀಸಿದವು ಗಾಳಿ
ನೋಡಲು ಓಡೋಡಿ ಬಂತು ಮಿಂಚು
ಸ್ಪರ್ಶಿಸಲು ಹಾತೊರೆದು ಧರೆಗಿಳಿದ ಮಳೆರಾಯ

ನಾಟ್ಯವಾಡಿದವು ಜಿಂಕೆಗಳು
ಸಂತಸದ ಹಾಡನ್ನು ಹಾಡಿದವು ಪಕ್ಷಿಗಳು
ಅಂಬಾರಿಯ ಹೊರಲು ಸಿದ್ಧನಾದ ಗಜರಾಜ

ಹೀಗಿರಲು ಮುಟ್ಟಿದ ಸೂರ್ಯದೇವ
ಕೇಳಿತು ಅಮ್ಮನ ಸುಪ್ರಭಾತ
ಎದ್ದು ಕುಳಿತೆ ಮರುಗಿ ನನಸಾಗಿದ್ದರೆ ಎಂದು

ನಗು

ಮಗುವಿನ ಮುಗ್ಧ ನಗು 
ಕುಮಾರನ ಸ್ಫಟಿಕದ ನಗು 
ಕಿಶೋರನ ಹುಡುಗಾಟದ ನಗು 

ತಂದೆ ತಾಯಿಯ ಮಮತೆಯ ನಗು 
ನೆರೆಹೊರೆಯವರ ಕಾಳಜಿಯ ನಗು 
ಅಜ್ಜ ಅಜ್ಜಿಯ ಪ್ರೀತಿಯ ನಗು 

ಯುವತಿಗೆ ಮನಸೋತ ಯುವಕನ ಮುಗುಳ್ನಗು 
ಕನ್ಯೆಯ ಚೆಲುವಿನ ಗರ್ವದ ನಗು 
ಮದುಮಕ್ಕಳ ನಾಚಿಕೆಯ ನಗು 

ದಿಗ್ವಿಜಯಿಯ ಹೆಮ್ಮೆಯ ನಗು 
ಸೋಲಲ್ಲೂ ಜಯಕಂಡ ಕ್ರೀಡೆಯ ನಗು 
ದೇಶಪ್ರೇಮಿ ಯೋಧನ ಸಾರ್ಥಕತೆಯ ನಗು 

ರಾಜಕಾರಣಿಯ ಸುಳ್ಳು ಭರವಸೆಯ ನಗು 
ಮುಗ್ಧ ಜನರ ನಿರೀಕ್ಷೆಯ ನಗು 
ಕಳ್ಳ ಅಧಿಕಾರಿಯ ಕ್ರತಕ ನಗು 

ಮೋಸಗಾರನ ಮೋಹದ ನಗು 
ಜಿಪುಣನ ಲೋಭದ ನಗು 
ನಾಶಕ್ಕೆ ಮೂಲ ಈ ನಗು 

ಮನುಜನ ಒಂದು ಸಂಪತ್ತು  ನಗು
ಸಂಬಂಧಗಳ ಬೆಳವಣಿಗೆಗೆ ಕಾರಣ ನಗು 
ಏಳಿಗೆಯ ಬುನಾದಿ ನಗು  

ಅಮ್ಮ

ಭೂಮಿಗೆ ಕರೆತಂದವಳು
ನೋಡಿದಾಗ ಮೊದಲು ಕಂಡವಳು
ಮೊದಲ ಮಾತಾದವಳು ಅಮ್ಮ

ಮೊದಲ ಗುರುವಾದವಳು
ಪೆಟ್ಟು ನೀಡಿ ಬುದ್ಧಿ ಹೇಳಿದವಳು
ಪ್ರತಿಕ್ಷಣವೂ ನಗುವಂತೆ ಮಾಡಿದವಳು ಅಮ್ಮ

ಬಿದ್ದಾಗ ಎತ್ತಿದವಳು
ಅತ್ತಾಗ ರಮಿಸಿದವಳು
ಕಥೆ ಹೇಳಿ ಮಲಗಿಸಿದವಳು ಅಮ್ಮ

ಮನೆಗಾಗಿ ದುಡಿದವಳು
ಪರರ ಸೇವೆ ಮಾಡಿದವಳು
ವಿಶ್ರಾಂತಿಯ ಕಾಣದವಳು ಅಮ್ಮ

ಪತಿಯ ಸಾರಥಿಯಾದವಳು
ಮಕ್ಕಳ ಏಳಿಗೆಗೆ ಕಾರಣಳು
ತವರಿನ ಹೆಸರು ಉಳಿಸಿದವಳು ಅಮ್ಮ

ಸೋಲಲ್ಲೂ ಗೆಲುವಲ್ಲೂ ಜೊತೆಗಿದ್ದವಳು
ಪತಿ ಪುತ್ರರ ಬೈಗುಳವ ಸಹಿಸಿದಳು
ಸದಾ ನಮ್ಮ ಶ್ರೇಯಸ್ಸನ್ನು ಬಯಸುವವಳು ಅಮ್ಮ