ನಮ್ಮೂರು

ಮೂಡಣಕ್ಕೆ ಮುಖ ಮಾಡಿ ನಿಂತ ಮನೆಗಳು 
ಬೆರಳೆಣಿಕೆಯ ಸಂಸಾರಗಳು 
ಪ್ರತಿ ಮನೆಯಲ್ಲೂ ಪುಟ್ಟ ಪುಟ್ಟ ಮಕ್ಕಳು   

ಮುಂಭಾಗದಲ್ಲಿ ಹರಡಿದೆ ಅಡಿಕೆ ತೋಟ 
ಹಿಂಭಾಗದಲ್ಲಿ ದಟ್ಟವಾದ ಕಾಡು 
ಊರ ಹೊರಗಿನ ಎರಡು ಕೆರೆಗಳು 

ಊರ ಮಧ್ಯದಲ್ಲಿದ್ದಾನೆ ನಮ್ಮ ಗಣಪ 
ತೋಟದಲ್ಲಿದ್ದು ಕಾಯುತ್ತಾನೆ ನಾಗಪ್ಪ 
ಅಲ್ಲಿಯೇ ಇದ್ದಾಳೆ ನಮ್ಮವ್ವ ಚೌಡಿ 

ಬಗೆ ಬಗೆಯ ಮಾವಿನ ಗಿಡಗಳು 
ವಿದವಿಧದ ಹಣ್ಣುಗಳು 
ತರತರಹದ ಔಷಧಿ ಗಿಡಗಳು 

ದೂರದಲ್ಲಿರುವ  ನಮ್ಮ ನೆಚ್ಚಿನ ಶಾಲೆ 
ದಾರಿಯಲ್ಲಿ ಸಿಗುವ ನೀರಿನ ಬುಗ್ಗೆಗಳು 
ಎದುರಲ್ಲಿ ಆಗುವ ಕಬ್ಬಿನ ಆಲೆಮನೆ 

ಅಡಿಕೆ ಒಣಗಿಸಲಿರುವ ಚಾಲಿಕಣ
ಆಗಿದೆ ಅದು ನಮ್ಮ ಆಟದ ಮೈದಾನ 
ಅಲ್ಲಿ ಮಲಗುವುದೆಂದರೆ ನಮಗೆ ಔತಣ 

ಸುಪ್ರಭಾತ ಹಾಡುವ ಹಕ್ಕಿಗಳು 
ನಾಟ್ಯ ಮಾಡುವ ನವಿಲುಗಳು 
ಆಟ ಆಡುವ ಮೊಲ ಅಳಿಲುಗಳು 

ಮನಸಿಗೆ ಮುದ ನೀಡುವ ಸೂರ್ಯಾಸ್ತ 
ವಿಶಾಲವಾದ ಭತ್ತದ ಗದ್ದೆಗಳು 
ನೀರಾವರಿಗೆ ನೆರವಾಗುವ ಹೊಳೆ 

ವರ್ಣಿಸಲು ಸಾಲದು ಶಬ್ದಗಳು 
ಇವು ನಮ್ಮೂರಿನ ಸಂಗತಿಗಳು 
ಹೆಮ್ಮೆಯಾಗುತ್ತದೆ ಇದನ್ನು ಹೇಳಲು